Олоҥхо декадатын аһыллыыта

Олоҥхо  сирдиир үрдүккэ,

Олоҥхо сирдиир сырдыкка…

Норуоппут киэн туттар бөдөҥ айымньыта – Олоҥхо  бүтүн аан дойду үрдүнэн  киһи –аймах чулуу (шедевр) айымньыта диэн билиниллибит өрөгөй күнүттэн номнуо 15 сыл ааста. Бу сыллар тухары Олоҥхо муҥура биллибэт баай ис хоһооно  кэнчээри ыччаты иитии-үөрэтии  сүрүн  түһүлгэтинэн буолан кэллэ.  Үтүө үгэс быһыытынан сылтан сыл “Ф.И. Авдеева аатынан оҕо  айымньытын дыбарыаһа” олоҥхо ыйын киэн хабааннаахтык, саҥаттан саҥа ис хоһоонноох бэлиэтиир. Ол курдук бу ый 21 күнүгэр Олоҥхо декадатын арыйыы үөрүүлээх тэрээһинэ буолла.   Декада арыллыыта  алгыс тылынан арчыланна. Алгысчыт — Виктор Игнатьев хомоҕой хоһоон, ылбаҕай ырыа, дьүрүскэн тойук тылынан  оҕо иитиитигэр туһаайыллар үлэ-үөрэх ситиһиилээх буоларын түстээтэ.

Салгыы Саха республикатын культуратын үтүөлээх  үлэһитэ, “Ийэ кут” уһуйааччылар түмсүүлэрин салайааччыта, научнай-методическай үлэҕэ уонна тас дойдуну кытта сибээскэ Олоҥхо киинин сүрүннүүр специалиһа Зоя Григорьевна Сысолятина саха киһитигэр олоҥхо суолтатын туһунан манныгы эттэ:

-Билигин олоҥхону олох олоруу оскуолата оҥостор кэм  кэллэ…Аныгы сайдыылаах кэм киһитэбин диэн, төрөөбүт тылтан — саха тылыттан тэйиччи  туттуман. Төрөөбүт сахабыт норуотугар төһөлөөх тылга  дьоҕурдаах, талааннаах оҕо баара буолуой?! Оннук оҕо талаанын арыйан, сайыннаран таһаарыы — эбии үөрэхтээһин педагогун ытык иэһэ… Онуоха холобурунан, биһиги киэн туттар киһибит,  эбии үөрэхтээһин  уопуттаах педагога Наталья Иннокентьевна Мордовская  үлэтэ буолар. Кини үөрэппит оҕолоро: Александр Дьячковскай – Саарын, Георгий Белоусов биһиги ортобутугар биллэр –көстөр, саха төрүт культуратын тарҕата үлэлии-хамныы сылдьар, эдэр кэскиллээх киэн туттар дьоммутунан  буолаллар. Олоҥхонон иитии үлэтэ дириҥник хорутуллан ыытыллыах тустаах! Олоҥхо саха киһитин араҥаччылыыр, арчылыыр сүдү күүстээх!

Директоры  иитэр үлэҕэ  солбуйааччы — Татьяна Семеновна Винокурова, Оҕо дыбарыаһын үөрэҕин программатын чэрчитинэн оҕону олоҥхо педагогикатынан иитии-үөрэтии  тиһигин быспакка ситимнээхтик ыытылларын  бэлиэтээтэ, уонна бу буолар тэрээһиннэргэ, сыллааҕы үлэбит үтүө түмүктэрин көрөбүт диэн эҕэрдэтин эттэ.

 Мантан салгыы Оҕо айымньытын дыбарыаһын выпускнига, Нам улууһун Түбэ нэһилиэгин баһылыгын солбуйааччыта  Петр Попов  толоруутугар олоҥхоттон быһа тардыы тэрээһини киэргэттэ.

 Олоҥхо декадатын арыйыы үөрүүлээх чааһын сэргэ былыргылыы хабылыкка, хаамыскаҕа оскуолалар икки ардыларыгар онлайн- күөн күрэс Анжелла Тимофеевна Андросова салайыытынан ыытылынна.   Күрэхтэһиигэ алта оскуола хамаанда туруоран кытынна: Айыы кыһата, НПСОШ №2, СКОШ-И №34, СОШ №7, Ф.И. Авдеева аатынан Оҕо айымньытын дыбарыаһа, С.Ф. Гоголев аатынан ЯПК начальнай оскуолата кыттыыны ыллылар. Хамаанда састаабыгар түөрт киһи: төрөппүт, оҕо, педагог уонна оскуола салайааччыта киирэннэр, күрэс ордук интэриэһинэйдик, көхтөөхтүк уонна тыҥааһыннаахтык ааста.

Түмүккэ кыайыылаахтарынан, СКОШ-И №34 – 1 миэстэ, СОШ №7 – 2 миэстэ,  Айыы кыһата – 3 миэстэ буоллулар. Сахалыы остуол оонньууларын Федерациятын президенэ Ольга Григорьевна Григорьева Хабылык, хаамыска оонньуута киэн эйгэҕэ сыаналанарын, оҕону эрэ буолбакка хас биирдии саха киһитин өйүн-күүһүн сытыылыырыгар, эрчийэригэр ураты суолталааҕын бэлиэтээн эттэ.

Зоя Григорьевна Сысолятина: “Олоҥхо саха киһитин араҥаччылыыр, арчылыыр сүдү күүстээх!” – диэн дириҥ ис хоһоонноох этиитин үс куппутунан  ылынан, иҥэринэн, сайдар сайдам аартык суола оҥоһуннахпыт буоллун!  Саханы саха дэтэр  Олоҥхо сүдү күүһүгэр сүгүрүйэн, кэлэр кэнэҕэс кэнчээри ыччаты иитэр эркээйилээх суол оҥоһуннахпыт буоллун!

Олоҥхо декадата аһыллыытын видеотун Оҕо дыбарыаһын YouTube-каналыгар ссылканан киирэн көрүөххүтүн сөп https://youtu.be/zgEwAmpOBEE

Л.А.Романова, Ф.И.Авдеева аатынан Оҕо айымньытын дыбарыаһын педагога

Предыдущая новость
Следующая новость