Хомус дьүрүскэн матыыба

Дьүрүһүйэ кутуллар алыптаах дорҕоонноох, норуоппут уратытын, талаанын туоһулуур кып-кыра эрээри эмтиир, абылыыр күүстээх сахабыт хомуһа — биһиги киэн туттуубут.

Хомус дьүрүскэн матыыба быйыл Дьокуускайбытыгар Аан дойду виртуоз хомусчуттарын муста. Ол курдук, Башкорскантантан Миндигафур Заенитдинов, Индияттан Нептун Чапотин, Японияттан Тадагава, Норвегияттан Вестад Свейн курдук аатырбыт хомусчуттар, ону таһынан Москваттан, Венгрияттан, Монголияттан хомуска таптаан оонньооччулар кыттыыны ыллылар.

Ити курдук, быйыл бэлиэ күҥҥэ анаан хомус музейыгар ыытыллыбыт тэрээһиннэр киэн далааһыннаахтык буолан аастылар. Хомус музейын саҕалаан тэрийээччи МиЦХНМ президенэ И.Е. Алексеев уонна КиДР миниистирэ Ю.С. Куприянов Аан дойду таһымыгар билиниини ылар хомуспут- Сахабыт норуотун культуратын биир улахан кэскиллээх баайбытынан буоларын бэлиэтээн эҕэрдэлэрин тиэртилэр. Тэрээһиҥҥэ Спиридон Шишигин, Альбина Дегтярева, Юлияна Кривошапкина курдук киэн туттар хомусчуттарбытын сэргэ биһиги Дыбарыаспыт “Этигэн хомус” народнай ансаамбыла кыттыыны ылан үөрүүлээх күнү киэргэттэ.

Хомус алыптаах эйгэтигэр иитиллэн, сахабыт норуотун культуратын сайдыытыгар кылааттарын киллэрсэ, үүнэ-сайда сылдьар оҕолорбутугар уонна кинилэр салайааччыларыгар Агния Спиридоновна Жирковаҕа үрдүктэн үрдүк кирбиилэри, саҥаттан саҥа арыйыылары, ситиһиилэри баҕарабыт!

Үйэлэри уҥуордуур аналлаах хомус кэрэ дорҕоонунан сир үрдүн киэргэтэ, симии турун!

Предыдущая новость
Следующая новость