«Төрөөбүт дойдум мин сүрэхпэр…»

Ахсынньы 17 күнүгэр «Тыл маастарыстыбата» куруһуок (педагог Лена Ананьевна Романова) «Төрөөбүт дойдум мин сүрэхпэр…» диэн литературнай-музыкальнай гостинайга ыалдьыттары түмтэ.

 

Сыл аҥаардааҕы отчуоттуур тэрээһиҥҥэ 25 оҕо кыттыыны ылла, ону таһынан старшай методист Тамара Николаевна Багаева, “Айылгы” этнокультурнай киин салайааччыта Татьяна Александровна Федотова, старшай педагог Лина Семеновна Яковлева уонна атын педагогтар ыалдьыттаатылар. Оҕолор араас айар бөлөхтөртөн мустан төрөөбүт дойдуга ананан араас сылларга суруллубут айымньылары уус-ураннык аахтылар.

Тэрээһиҥҥэ оҕону төрөөбүт дойдутун таптыырга, ытыктыырга иитии сүрүн боппуруостарыгар эппиэт биэрэр ис хоһоонноох Матусовскай «С чего начинается Родина» ырыа-хоһооно сүрүннүүр айымньынан буолла.

Оҕолор саха уонна нуучча биллиилээх, народнай, ырыаһыт поэттарын Семен Данилов, Наталья Михалева –Сайа, Алексадр Пушкин, Сергей Есенин хоһооннорун ааҕан, истээччи биһирэбилин ыллылар. Улуу, талааннаах суруйааччылар хоһоон нөҥүө төһөлөөх дириҥ санааны эппиттэрин, олоххо тапталы иитэллэрин, аар айылҕаҕа сүгүрүйүүгэ ыҥыралларын өссө төгүл итэҕэйдибит. Кэнчээри ыччакка дойдуга ытыктабылы иитии, айылҕаҕа тапталтан саҕаланарын бэлиэтэннэ. Ол курдук, Сахабыт Сирин аар саарга аатырбыт тыйыс эрээри, үрүҥ көмүс мөһүүрэнэн күлүмүрдүүр ураты кэрэ кыһыҥҥы айылҕатыгар анаммыт хоһооннор сүрүн миэстэни ыллылар. Бу күн куруһуок иитиллээччитэ Альбина Федорова «Дьүкээбил суһумун туппутум” диэн учууталыгар анаабыт авторскай хоһооно ырыа быһыытан сүрэхтэннэ.

Хас биирдии толорооччу айымньы ис хоһоонун, тугу этэрин, туохха үөрэтэрин өйдөөн, ылынан туран иэйиилээхтик ааҕан, дьон иннигэр саҥарар, кэпсиир, дьоҕура сайдыбытын көрдөрдө.

«Төрөөбүт дойдум мин сүрэхпэр…» литературнай-музыкальнай гостинай тэрээһинин сүрүн көмөлөһөөччүлэринэн буолбут күндү төрөппүттэрбитигэр уонна «Төрөөбүт дойдум» авторскай ырыатынан киэргэппит, кэрэ куоластаах коллегабытыгар Анастасия Афанасьевна Третьяковаҕа махталбытын тиэрдэбит.

Куруһуок салайааччыта, Лена Романова

Предыдущая новость
Следующая новость