“Төрөөбүт тылгын билэҕин дуо?”. Биктэриинэ түмүктэрэ

Төрөөбүт тыл, сурук-бичик декадатын чэрчитинэн үгүс элбэх үлэ Оҕо айымньытын дыбарыаһыгар ыытылынна. Онно “Айылгы” этнокултуурунай киин эбии үөрэхтээһинин педагогтара бары биир киһи курдук кыттыыны ыллылар, үөрэтэр оҕолоругар бастакы саха  суругун-бичигин олохтообут лингвист-учуонай С.А.Новгородов олоҕун, үлэтин сэһэргиир ис хоһоонноох тэрээһиннэри, дьарыктары, хоһоону айыы, оһуохай күрэхтэрин, ыыттылар. “Саха тыла” куруһуок уһуйааччыта Мария Попова бэлэмнээбит “Төрөөбүт тылгын билэҕин дуо?” диэн ааттаах онланй биктэриинэтэ Саха Өрөспүүбүлүкэтин олохтоохторун интэриэһин тарта. Олунньу 11-15 күннэригэр 37041 киһи кыттыыны ылла. Биктэриинэ 15 ыйытыылаах. Манна тыл суолтатын быһаарыыга, таабырыны таайыыга, өс хоһооннорун ситэриигэ, тыллары таба суруйууга, тыллары таба саҥарыыга үстүү ыйытыылардаах этэ.                    

Биирдии күннэринэн эппиэттэр ахсаанарын ылан көрдөххө саамай элбэх киһи олунньу 13, Төрөөбүт тыл, сурук-бичик күнүгэр эппиэттээбит – 26503 эппиэт. Көстөрүн курдук, ити улахан сыыппара тыл бырааһынньыгын элбэх киһи билинэрин кэрэһэлиир.

Биктэриинэ биирдии ыйытыыларынан төһө сөпкө эппиэттээбиттэрин көрдөххө, таабырыны таайыыга (53%), өс хоһооннорун билиигэ(55,6%)  көрдөрүү орто, тыл суолтатын билиигэ (69,6%) , тылы таба суруйууга( 67,6%), тылы таба саҥарыыга (77,6%)  үрдүк көрдөрүү  бэлиэтэннэ.

Эппиэттэргэ сыана туруоруллар гына айыллыбыта кэрэхсэбиллээх түмүгү биэрдэ. “5” сыанаҕа 5967, “4” сыанаҕа 18838, “3” сыанаҕа 10.056, “2” сыанаҕа  баара-суоҕа 2231 киһи эппиэттээтилэр (диаграмманы көр).

“5” сыананы ылбыт дьон биктэриинэни  толорбут бириэмэлэринэн көрөн , бастыҥнарга маннык уон киһини бэлиэтиибит: Афанасьева Екатерина  Романовна (36 сөк.), Дягилева Галина Павловна (36 сөк), Бугаев Алексей Александрович (37 сөк), Васильев Петр Сергеевич (37 сөк), Ураты Уран Тыл ((38 сөк), Пахомова Валентин Валентинович (38 сөк),Ущницкая Евдокия Артемовна (39 сөк), Федорова Анастасия Тихоновна (40 сөк), Трофимова Анжела Андреевна (41 сөк), Дьячковская  Галина Владимировна (41 сөк)

Бу биктэриинэни ааспыт дьон ахсааныгар Саха сиригэр олорор араас омуктар бааллара  хайҕаллаах, саха тылыгар интэриэс сүппэккэ өссө эбиллэ турарын кэрэһэлиир. Сахабыт тылын  сарсыҥҥы күнэ сардаҥалаах эбит диэн итэҕэлбит күүһүрэн биэрдэ.

Биктэриинэ тумугун кердерер диаграмма.

Предыдущая новость
Следующая новость